Қолданбалы лингвистика бойынша республикалық іріктеу олимпиадасы қорытындыланды

ҚР ОАМ «Дарын» РҒПО 8-11 (12) сынып оқушыларына арналған қолданбалы лингвистика бойынша республикалық іріктеу олимпиадасын өткізді.

Олимпиаданың негізгі мақсаты – оқушылардың қолданбалы лингвистикаға қызығушылығын арттыру, олардың ой-өрісін дамыту, ғылыми білімді насихаттау, сондай-ақ лингвистика бойынша халықаралық олимпиадаларға қатысуға арналған олимпиадалық резерв қалыптастыру.

Ережеге сәйкес олимпиада үш кезеңнен тұрды:

Бірінші (аудандық/қалалық) кезең 2025 жылғы 5 қарашада өтіп, оған 9 582 оқушы қатысты;

Екінші (облыстық) кезең 2025 жылғы 24 қарашада ұйымдастырылып, оған 900-ге жуық оқушы қатысты.

Алғашқы екі кезеңнің қорытындысы бойынша 2025 жылғы 23 желтоқсанда 71 оқушы республикалық үшінші кезеңге жолдама алды.

Республикалық кезеңнің нәтижесінде 32 жеңімпаз анықталды:

I орын – 6 оқушы, II орын – 10 оқушы, III орын – 16 оқушы.

Сонымен қатар ең жоғары ұпай жинаған алғашқы 12 оқушы халықаралық олимпиадаларға қатысуға арналған олимпиадалық резерв құрамына қабылданды.