Алматыда Халықаралық Жәутіков олимпиадасы IZhO2026 басталды

Бүгін Almaty Theatre төрінде математика, физика және информатика пәндері бойынша 22-ші Халықаралық Жәутіков олимпиадасының ашылу салтанаты өтті. Олимпиадаға 16 елден 612 оқушы мен 122 педагог қатысуда. Олардың қатарында Армения, Әзербайжан, Беларусь, Болгария, Грузия, Қазақстан, Қырғызстан, Моңғолия, Пәкістан, Ресей, Румыния, Тәжікстан, Түркменстан, Индонезия, Үндістан және Өзбекстан бар.

Қатысушыларды «Дарын» РҒПО директоры Ғаждембек Тұрсынов, ҚР ҰҒА академигі Аскар Жұмаділдаев және «РФММ» КеАҚ басқармасының төрағасы Руслан Қалиев құттықтады.

Ғаждембек Тұрсынов олимпиаданың талантты оқушылар үшін маңызды алаңға айналғанын атап өтті. «Мұндай жарыстар оқушылардың қабілеттерін дамытып қана қоймай, ғылымға деген қызығушылықты оятады», – деді.

Қазылар алқасының төрағасы Аскар Жұмаділдаев халықаралық олимпиаданың мәнін және тәжірибе алмасуға беретін мүмкіндіктерін атап көрсетті. «Бұл есептер тек формулаларды есте сақтауды талап етпейді, олар шығармашылық ойлауды, талдауды және күтпеген шешімдер іздеуді үйретеді. Осы жерде ғылымның шынайы мәні көрінеді», – деп қосты академик.

Руслан Қалиев іс-шараның білім беру маңыздылығына тоқталды. «Біздің мектеп үшін мұндай деңгейдегі олимпиаданы өткізу – үлкен мәртебе. Мұнда тек жарыс қана емес, оқушылар арасындағы өзара құрмет пен достық қалыптасады, бұл олардың дамуына жаңа мүмкіндіктер ашады», – деді ол.

Олимпиада екі турдан тұрады — теориялық және практикалық. Есептер халықаралық қазылар алқасымен дайындалып, мамандандырылған сыныптар бағдарламасына сәйкес келеді.

Қатысушылар да әсерлерімен бөлісті. Олимпиадаға алғаш рет Индонезия командасы қатысып отыр. Команда жетекшісі Ажат Адрианшя, Алматы оларды жылы қабылдағанын айтып, мұнда жаңа достар табуды үміт ететінін айтты. «Елімізде ұлттық конкурс кейінге қалдырылғандықтан, математикадан тек бір ғана оқушы әкелдік, бірақ біз осында болғанымызға қуаныштымыз», – деді тәлімгер.

Олимпиада бес күнге созылады, ал жеңімпаздар 15 қаңтар күні белгілі болады.

Олимпиаданың ұйымдастырушылары: ҚР Оқу-ағарту министрлігі, «Дарын» РҒПО , «РФММ» КеАҚ және «Алматы дарыны» орталығы.