Алматыда XXII Халықаралық Жәутіков олимпиадасының жеңімпаздары анықталды

Алматыда 10-15 қаңтар аралығында өткен XXII Халықаралық Жәутіков олимпиадасы қорытындыланды. Шараға ҚР Оқу-ағарту министрі Жұлдыз Сүлейменова қатысып, жеңімпаз оқушыларды марапаттады. Биыл олимпиадаға математика, физика және информатика пәндерінен барлығы 612 оқушы мен 122 команда жетекшісі қатысты. Сайыскерлер әлемнің 16 елінен қатысты. Олардың арасында Армения, Әзербайжан, Беларусь, Болгария, Грузия, Қазақстан, Қырғызстан, Моңғолия, Пәкістан, Ресей, Румыния, Тәжікстан, Түркменстан, Индонезия, Үндістан және Өзбекстаннан келген оқушылар бар.

Олимпиада екі турдан тұрды. Тапсырмалар мамандандырылған сыныптар бағдарламасына сәйкестендірілді және оларды халықаралық қазылар алқасы құрастырды. Қазылар алқасының төрағасы – ҚР ҰҒА академигі Асқар Жұмаділдаев.

«Мемлекет басшысы Қасым-Жомарт Тоқаев жуырда Қазақстан үшін техникалық интеллегенцияны құрылымдау өте маңызды, тіпті стратегиялық қажеттілік деген болатын. Ал, техникалық интеллегенция – инновациялардың, жаңа технологиялардың және өнімділіктің драйвері бола алады. Сіздер білім сайысында математика, физика және информатика пәндерінен терең білімдеріңізді көрсетіп, логикалық және шығармашылық ойлау қабілеттеріңізді шыңдадыңыздар.Көптің арасынан суырылып алға шықтыңыздар. Сіздер еліміздің келешек техникалық интеллегенциясының негізін құрайтын мақтанышысыздар. Сіздердің жүлделеріңіз – Қазақстанның халықаралық деңгейде интеллектуалдық әлеуетінің мойындалуы», – деді ҚР Оқу-ағарту министрі Жұлдыз Сүлейменова.

Биылғы олимпиада қорытындысы бойынша 70 оқушы алтын, 96 оқушы күміс, 158 оқушы қола медаль иеленді. Осылайша, жарыс аясында барлығы 324 медаль сарапқа салынды. Сонымен қатар, сайыс барысында жоғары нәтиже көрсеткен командалардың жетістіктері де арнайы аталып өтті.

Абсолютті жеңімпаз команда атағын Румыниядан келген International Computer High School of Bucharest мектебінің командасы жеңіп алды. Бірінші орын мен «Үздік олимпиадалық команда» атағы Ресейдің Lyceum «Second School» named after V.F. Ovchinnikov командасына бұйырды. Екінші орынды Ресейдің Kapitsa Phystech Lyceum және Vorobyovy Gory командалары иеленді. Үшінші орынды Алматы қаласындағы Республикалық физика-математикалық мектебі (Қазақстан), Sofia High School of Mathematics (Болгария) және Presidential Physics and Mathematics Lyceum №239 (Ресей) командалары олжалады.

Айта кету керек, қазақстандық оқушылардың жалпы қоржынында 132 медаль бар. Оның ішінде 28 алтын, 35 күміс және 69 қола медаль еншіленді.
Бұдан бөлек, еліміздің жетекші жоғары орындары, атап айтқанда SDU, Satbayev University, NarХoz University және Almaty Energo университеті тараптарынан жеңімпаздарға ректорлық гранттар табысталды.

Командалық орын иегерлері кубоктармен және смартфондармен марапатталды. Барлық жүлдегерлер Қазақстан Республикасы Оқу-ағарту министрлігінің дипломдары мен алтын, күміс және қола медальдарымен марапатталды.

Ұйымдастырушылар: Қазақстан Республикасының Оқу-ағарту министрлігі, «Дарын» республикалық ғылыми-практикалық орталығы, «Республикалық физика-математика мектебі» КеАҚ және «Алматы дарыны» қалалық орталығы.