Қазақстан құрама командасы 37-ші Балкан математикалық олимпиадасына (Balkan mathematical olympiad) қатысты. Ағымдағы жылы әлемдегі пандемия жағдайына байланысты, Олимпиада 31 қазан мен 5 қараша аралығында қашықтық форматында өткізілді. Бұл жарысқа әлемнің 18 елінен 154 оқушы қатысты. Биылғы жылы Олимпиаданы  ұйымдастырған Румыния елі болатын.

Балкан математикалық олимпиадасы - Еуропа елдерінің оқушыларына арналған халықаралық математикалық жарыс. Қазақстан Олимпиадаға қонақ ел ретінде қатысты.

Олимпиадаға қатысқан Ұлттық құрама командасы 6 қатысушыдан тұрды. Олар 2019 жылғы республикалық олимпиаданың жеңімпаздары мен жүлдегерлері, сонымен қатар олимпиадалық резерв мүшелері.

Биыл құрама команданың көрсеткен нәтижелері өте жоғары болды. 37-ші Балкан математикалық олимпиадасының қорытындысы бойынша Ұлттық құрама командасы екі күміс және  төрт қола медальді жеңіп алды.

Күміс медаль иегерлері: Олжабаев Асылбек, Алматы қаласы физика-математика бағытындағы «Назарбаев Зияткерлік Мектебінің» 12 сынып оқушысы; Сатубалдин Таир, Алматы қаласы физика-математика бағытындағы «Назарбаев Зияткерлік Мектебінің» 11 сынып оқушысы.

Қола медаль иегерлері: Бектемисов Тамирлан, Алматы қаласы физика-математика бағытындағы «Назарбаев Зияткерлік Мектебінің» 11 сынып оқушысы; Сакенов Батырхан, Алматы қаласы «Республикалық физика-математика мектебінің» 10 сынып оқушысы; Тен Юрий , Алматы қаласы «Heileybury» мектебінің 11 сынып оқушысы; Сам Фетуллах – Нұр-сұлтан қаласы дарынды балаларға арналған "Білім – Инновация" лицей-интернатының 11 сынып оқушысы.

Құрама команда мүшелерін, олардың ата-аналарын және мұғалімдерді осы жеңістерімен құттықтаймыз!