Кіру/Тіркелу
2024 жылдың 12-14 мамыры аралығында Шығыс Қазақстан облысының Өскемен қаласында қазақ тілі мен әдебиетінен Қанипа Омарғалиқызы Бітібаева атындағы республикалық олимпиада өз мәресіне жетті. Олимпиадаға республиканың білім беру ұйымдарының 9-11 сыныптарынан 160 дарынды оқушысы жиналды. Олардың 76-ы жеңімпаз бен жүлдегер атанды.
Олимпиада дарынды балаларға арналған Жамбыл атындағы облыстық мамандандырылған мектеп-гимназия-интернат базасында өтті. Олимпиаданың республикалық кезеңі эссе жазу мен сұрақтарға ауызша жауап беруді қамтитын екі айналымнан тұрды.
Қазылар алқасының құрамына ғалымдар, Республиканың жоғарғы оқу орындарының оқытушылары кірді.
Олимпиаданың салтанатты жабылуында С. Аманжолов атындағы Шығыс Қазақстан университеті ректоры М. Төлеген, ҚР Оқу-ағарту министрлігінің «Дарын» республикалық ғылыми-практикалық орталығының өкілі З. Аманова және Шығыс Қазақстан облысы білім басқармасы басшысының орынбасары А. Ақылбек қатысушыларға жылы лебіздерін білдіріп, құттықтады.
«Құрметті, олимпиада қатысушылары – қазақ тілінің жанашырлары! Қанипа Омарғалиқызы – халықтың рухани мәдениеті мен қазақстандық педагогика тарихының тұтас бір кезеңін танытқан тұлға. Халқымыз Қанипа Омарғалиқызын «Қазақтың Қанипасы» деп мақтанышпен атайды. Оның өскелең ұрпақты, жас қазақ элитасын тәрбиелеудегі еңбегі ұшан-теңіз. Ұлттық педагогикадағы тұтас бір бағыт – тәуелсіз мемлекетімізде қазақ тілі мен әдебиетін жаңғырту мен дамытудың ғылыми-әдістемелік негізін жасау – осы Ұстаздың есімімен тығыз байланысты. – Қанипа Омарғалиқызы көптеген төл бағдарламалар, оқулықтар мен оқу-әдістемелік кешендер әзірлеп, педагогикалық озаттың ондаған лайықты ізбасарларын дайындады. Оның идеялық ізбасарлары мен шәкірттері бүгінде аса жауапты мемлекеттік қызметте еңбек етіп, белгілі ғалымдар, ұстаздар, мәдениет және өнер қайраткерлері. Олардың барлығы да ең жақсы адами және ұлттық салт-дәстүрлерді терең қастерлеу рухында тәрбиеленген лайықты тұлғалар. – Құрметті, жас дарындар! Сіздерде де Ұлы ұстаздың ізін басып, табысты болыңыздар!» – деді Зәуре Аманова.
Қазақстан Республикасы Оқу-ағарту министрлігінің I дәрежелі дипломдарымен 16 жеңімпаз, II дәрежелі дипломдарымен 23 жүлдегер және III орынымен 37 оқушы және «Ерекше жетістіктері үшін» грамотасымен 20 оқушы марапатталды.
Сонымен қатар, С. Аманжолов атындағы Шығыс Қазақстан университеті ректорының білім гранты Шығыс Қазақстан облысы, Күршім ауданы, №1 Күршім орта мектебінің 11 сынып оқушысы Идаятова Гүлім мен дарынды балаларға арналған Жамбыл атындағы облыстық мамандандырылған мектеп-гимназия-интернатының 11 сынып оқушысы Саяшова Мархабатқа табысталды.
Шәкәрім атындағы Семей университеті ректорының білім грантына Абай облысы, Бесқарағай ауданы, Беген орта мектебінің 11 сынып оқушысы Арыстанбекова Нұрай ие болды.
Сондай-ақ, жеңімпаздарға Қанипа Бітібаева туыстары мен дарынды балаларға арналған Жамбыл атындағы облыстық мамандандырылған мектеп-гимназия-интернаты түлектерінің арнайы сыйлықтары табыс етілді.
Іс-шараны ұйымдастырушылар: ҚР Оқу-ағарту министрлігінің «Дарын» республикалық ғылыми-практикалық орталығы, Шығыс Қазақстан облысының білім басқармасы және «Шығыс дарыны» өңірлік оқу-әдістемелік орталығы.
2022-2023 оқу жылы
Қазақ тілі мен әдебиетінің білгірлері Қанипа Бітібаева атындағы республикалық олимпиадасына жиналды
2023 жылдың 2-4 мамыры аралығында Шығыс Қазақстан облысының Өскемен қаласында Қазақстан Республикасы Оқу-ағарту министрлігінің «Дарын» республикалық ғылыми-практикалық орталығы Шығыс Қазақстан облысының білім басқармасымен бірлесіп, қазақ тілі мен әдебиетінен Қанипа Омарғалиқызы Бітібаева атындағы республикалық олимпиаданы өткізді.
Қазақ тілі мен әдебиеті пәнінен 9-11 сынып оқушыларының білімдерін тереңдету және жетілдіру, зияткерлік және шығармашылық қабілеттерін дамыту мақсатында республиканың білім беру ұйымдарының 169 дарынды оқушысы жиналды.
Олимпиаданың ашылу салтанаты «Ертіс Концерт» Орталық мәдениет сарайында өтті. Ашылу салтанатында Қазақстан Республикасы Оқу-ағарту министрі Ғ. Бейсембаевтың олимпиада ұйымдастырушылары мен қатысушыларына арнап жолдаған құттықтау сөзі оқылды.
Қатысушылар үшін мәдениет сарайының сахнасында Қанипа Бітібаеваның өмірі мен шығармашылығына арналған әдеби композиция қойылып, республикалық, халықаралық шығармашылық байқаулардың лауреаттары өнер көрсетті.
Олимпиада дарынды балаларға арналған Жамбыл атындағы облыстық мамандандырылған мектеп-гимназия-интернат базасында өтті. Олимпиаданың республикалық кезеңі эссе жазу мен сұрақтарға ауызша жауап беруді қамтитын екі кезеңнен тұрды.
Қатысушылар қазақ тілі мен әдебиетінің шығармаларын, Қ.О. Бітібаеваның өмірбаянын, ғылыми-педагогикалық мұрасын және публицистикалық еңбектерін білу бойынша сайысқа түсті.
Қазылар алқасының құрамына ғалымдар, Республиканың үздік жоғарғы оқу орындарының оқытушылары кірді.
Олимпиада өткізілу уақытында балалардың тұратын және өткізілетін жерінде қоғамдық тәртіпті, олардың өмірі мен қауіпсіздігін қамтамасыз ету мақсатында Шығыс Қазақстан облысының білім басқармасы, ШҚО денсаулық сақтау басқармасы мен ШҚО ішкі істер басқармалары тәулік бойы кезекшілік атқарды. Қатысушылардың жатын орындары мен шара өтетін жерлері тексерілді. Жатын орындары мен тамақтанулары санитарлық талапқа сай болуы ШҚО санитарлық эпидемиологиялық бақылау басқармасымен келісілді. Өрт қауіпсіздігінің сақталуын ШҚО Төтенше жағдайлар департаменті өз бақылауында ұстады.
Олимпиада қатысушылары үшін көлік қызметі ұйымдастырылып, ШҚО ішкі істер департаменті Жол полициясы қызметкерлерінің бірге ілесіп жүруімен кесте бойынша қала ішінде қозғалыс қамтамасыз етілді.
С. Аманжолов атындағы Шығыс Қазақстан университетінде өткен олимпиаданың салтанатты жабылуына Қазақстан Республикасы Оқу-ағарту министрлігінің Орта білім беру комитеті төрағасының орынбасары Ж. Карамбаев қатысты.
Республикалық олимпиаданың қорытындысы бойынша 81 жеңімпаз бен жүлдегер Қазақстан Республикасы оқу-ағарту министрлігінің дипломдарымен (I орын – 17 оқушы, II орын – 23 оқушы, III орын – 41 оқушы), 29 оқушы «Ерекше жетістіктері үшін» Оқу-ағарту министрлігінің грамотасымен марапатталды.
С. Аманжолов атындағы Шығыс Қазақстан университеті ректорының білім гранты Күршім ауданы, Н. Островский атындағы №4 орта мектебінің 11 сынып оқушысы Нұрхай Аякөз бен Шәкәрім атындағы Семей университетінің гранты Абай облысы Ақсуат ауданының М. Әуезов атындағы Көкжыра орта мектебінің 11 сынып оқушысы Мұратжанова Маралға табыс етілді.
Бітібаевтар әулеті атынан ерекше көзге түскен жеңімпаздар мен жүлдегерлерге ақшалай сыйлықтар берілді.
Олимпиада аясында қатысушыларға мәдени-танымдық бағдарлама ұйымдастырылды: облыстық драма театрында өткен қойылымды тамашалап, «Музыкалық терапия» шарасына қатысты, жетекшілер үшін шеберлік сыныбы, «Өрлеу» біліктілікті арттыру орталығының «Ұстаздар үйіне» экскурсия ұйымдастырылды.
2021-2022 оқу жылы
Қанипа Бітібаева атындағы қазақ тілі мен әдебиетінен республикалық олимпиаданың қорытындысы
Қазақстанда Балалар жылын мерекелеу аясында 2022 жылдың 3-6 мамыры аралығында Өскемен қаласында Қазақстан Республикасы Білім және ғылым министрлігінің «Дарын» республикалық ғылыми-практикалық орталығы Шығыс Қазақстан облысының білім басқармасымен бірлесіп, қазақ тілі мен әдебиетінен Қанипа Омарғалиқызы Бітібаева атындағы республикалық олимпиаданы өткізді.
К.О. Бітібаеваның әзірлеген авторлық әдістемелігі бойынша қазақстан жастарының бірнеше буыны оқып үйренді. Оның қазақ тілі мен әдебиетіне қосқан үлесі әртүрлі елдің ғалымдары арасында баға жетпес құндылық болып есептеледі.
Жыл сайын республикамыздың түкпір-түкпірінен қазақ тілі мен әдебиеті пәнінен білімдерін тереңдету және жетілдіру, зияткерлік және шығармашылық қабілеттерін дамыту мақсатында дарынды оқушылар жиналады.
Олимпиаданың республикалық кезеңіне республиканың жалпы білім беретін мекемелерінің 200-ден астам 9-11 сынып оқушылары қатысты.
Олимпиаданың салтанатты жабылуы С. Аманжолов атындағы Шығыс Қазақстан университетінде өтті. Алғы сөзбен Қазақстан Республикасы Білім және ғылым министрлігінің Республикалық ғылыми-практикалық «Дарын» орталығының зертхана меңгерушісі З. Аманова, Шығыс Қазақстан облысы білім басқармасының басшысы С. Жумадилова қатысушыларға жылы лебізін білдірді.
Қазылар алқасының құрамына ғалымдар, Республиканың үздік жоғарғы оқу орындарының оқытушылары кірді.
Олимпиада дарынды балаларға арналған Жамбыл атындағы облыстық мамандандырылған мектеп-гимназия-интернат базасында өтті. Олимпиаданың республикалық кезеңі эссе жазу мен сұрақтарға ауызша жауап беруді қамтитын екі кезеңнен тұрды.
Республикалық олимпиаданың қорытындысы бойынша 95 жеңімпаз бен жүлдегер ҚР Білім және ғылым министрлігінің дипломдарымен (I орын – 19 оқушы, II орын – 28 оқушы, III орын – 48 оқушы), 18 оқушы «Ерекше жетістіктері үшін» «Дарын» РҒПО грамотасымен марапатталды.
С. Аманжолов атындағы Шығыс Қазақстан университеті ректорының білім гранты Күршім ауданы, Қалжыр орта мектебінің 11 сынып оқушысы Касаинова Ару мен Өскемен қаласындағы Жамбыл атындағы облыстық мамандандырылған мектеп-гимназия-интернатының оқушысы Қалибекова Перизатқа, ал Шәкәрім атындағы Семей университетінің гранты Семей қаласы, Шәкәрім атындағы үш тілде оқытатын көпбейінді мектеп-гимназиясының 11 сынып оқушысы Төлеуғазыева Жаннелге табыс етілді.
Бітібаевтар әулеті атынан ерекше көзге түскен жеңімпаздар мен жүлдегерлерге ақшалай сыйлықтар берілді.
Олимпиада аясында жетекшілер үшін шеберлік сыныбы, қатысушыларға мәдени-танымдық бағдарлама ұйымдастырылды: облыстық драма театрында өткен қойылымды, Шығыс Қазақстан өнер мұражайындағы көрмені тамашалады.
Жеңімпаздар мен жүлдегерлерді құттықтаймыз!
Сәттіліктер мен жоғары жетістіктер тілейміз!