Кіру/Тіркелу
2024 жылдың 11-12 қараша күндері елордада «Астана дарыны» дарынды балалар мен талантты жастарды анықтау және қолдау орталығының ұйымдастыруымен «ХХІ ғасыр көшбасшысы» зияткерлік сайысының қалалық кезеңі өтті. Бұл сайыс жастардың көшбасшылық қасиеттерін дамытуға бағытталған.
Сайыс екі тур бойынша ұйымдастырылды. Іріктеу кезеңінде 39 оқушы тест тапсырып, ең жоғары ұпай жинаған 12 оқушы ауызша турға өтті. Сайыс кезінде оқушылар өздерінің ойлау қабілетін, жылдам жауап беру шеберлігін және сахнадағы өзін-өзі ұстау мәдениетін көрсетті.
Қорытынды турда ең үздік 5 финалист анықталды:
• Ардана Аяз (№52 мектеп-гимназиясы);
• Алихан Айтбаев (Zerdeli International School);
• Айханым Нұрланқызы (№85 мектеп-лицейі);
• Алмаз Айткеш (№32 мектеп-гимназиясы).
• Сардар Амангельдин (Қ. Мырза Әлі ат. Binom мектеп-лицейі);
Олар «Астана дарыны» орталығының дипломдарымен марапатталып, сайыстың қатысушыларына сертификаттар табысталды. Жас зияткерлеріміз 2025 жылдың сәуір-мамыр айларында Алматы қаласында өтетін республикалық кезеңде Астана қаласының намысын қорғайтын болады.
Айта кетсек, 2024-2025 оқу жылында Қазақстан Республикасы Оқу-ағарту министрлігінің қолдауымен «Дарын» республикалық ғылыми-практикалық орталығы және «Хабар» агенттігі 11 (12) сынып оқушыларына арналған «XXI ғасыр көшбасшысы» интеллектуалдық ойынын жаңа форматта өткізуде. Дәл қазір Қазақстанның 17 облыс орталығы мен 3 республикалық қаласында іріктеу кезеңі өтіп жатыр.
Елорда жастарына ақтық кезеңде сәттілік тілейміз!