Қазақстан құрамасы IOL-2025 олимпиадасында соңғы екі жылдағы ең үздік нәтижесін көрсетті

Тайваньның Тайбэй қаласында Лингвистикадан халықаралық олимпиаданың (International Linguistics Olympiad, IOL) жеңімпаздары мен жүлдегерлерін марапаттау рәсімі өтті. Зияткерлік додаға әлемнің 47 елінен 400 оқушы қатысты.

Дәстүр бойынша, жабылу салтанаты жеке және командалық тур тапсырмаларының шешімдерін таныстырумен басталды. Биылғы жеке турда қатысушылар келесі тапсырмаларды орындады:

• дзонг-кэ тіліндегі сан есімдер (сино-тибет тілдер шоғыры, Бутан);

• гаам тіліндегі меншіктілік (нило-сахара тілдер тобы);

• курия тілінің морфосинтаксисі (банту тілдер шоғыры, Кения мен Танзания);

• кева тіліндегі құрылымдарды салыстыру (трансжаңа-гвинея тілдер шоғыры, Папуа — Жаңа Гвинея);

• какчикель тіліндегі психолингвистикалық тапсырма (майя тілдер шоғыры, Гватемала).

Командалық турда қатысушылар Непалдағы туыстас сино-тибет тілдері — цамлинг пен бантава бойынша күрделі тапсырманы бірлесе шешті.

Қазылар алқасы мен халықаралық комитет мүшелері шешімімен бірінші тапсырма — дзонг-кэ тіліндегі сан есімдер — ең оңай әрі қызықты деп танылды.

Қазақстан құрамасы соңғы екі жылдағы ең жоғары нәтижеге қол жеткізіп, екі Құрмет грамотасын (төртінші орын) иеленді:

Рамазан Бутантаев — Маңғыстау облыстық IT-лицейінің 10-сынып оқушысы;

Шыңғыс Қарасаев — Батыс Қазақстан облысындағы Назарбаев Зияткерлік мектебінің 11-сынып оқушысы.

Сонымен қатар команда құрамында:

Самир Сарбасов — Астана қаласындағы Назарбаев Зияткерлік мектебінің 12-сынып оқушысы;

Зере Серікова — Астана қаласындағы №9 «Зерде» мектебінің 11-сынып оқушысы болды.

Команда жетекшілері:

Аида Дәулетова — Германиядағы Тюбинген университетінің 1-курс студенті, лингвистика және география пәндерінен халықаралық олимпиадалардың жүлдегері;

Орал Шайхина — Республикалық ғылыми-практикалық «Дарын» орталығының маманы.