«Дарын» және EDU Stream: «Келешек мектептері» үшін әдістемелік қолдаудың жаңа көкжиектері

16-17 қазан күндері ҚР Оқу-ағарту министрлігінің «Дарын» республикалық ғылыми-практикалық орталығы мен халықаралық «EDU STREAM» білім беру компаниясы бірлесіп, еліміздің «Келешек мектептері» білім беру ұйымдарына қолдау көрсету мақсатында «Express Publishing оқу-әдістемелік кешені арқылы ХХІ ғасыр дағдылары мен құндылықтарын дамыту» атты республикалық онлайн-семинар өткізді.

Іс-шараның басты мақсаты – «Келешек мектептері» ағылшын тілі пәні мұғалімдерінің кәсіби құзыреттілігін арттыру, заманауи әдістемелер мен «EDU Stream» оқулықтарын тиімді қолдану тәжірибесін кеңейту болды.

Семинар бағдарламасы аясында: 16 қазан күні бастауыш сынып мұғалімдеріне арналған сессия өтті; 17 қазан күні негізгі және жоғары сынып мұғалімдеріне арналған бөлім жалғасын тапты.

Іс-шара барысында педагогтер ағылшын тілін оқытудың инновациялық тәсілдерімен, ұлттық және жалпыадамзаттық құндылықтарды білім беру процесіне кіріктіру жолдарымен, сондай-ақ оқушылардың сөйлеу, тыңдау, жазу және оқу дағдыларын дамыту әдістерімен танысты.

Спикерлердің жұмысы жоғары бағаланды. Олар тыңдаушыларға сабақта қолдануға болатын тиімді әдістемелік құралдар ұсынып, шетел тілін оқытудың заманауи стратегияларын тәжірибе жүзінде көрсетті.

Спикерлер қатарында: Садирбаева Дина Медетбекқызы – «EDU Stream» компаниясының әдіскері, педагог-зерттеуші (Қызылорда облысы); Беляева Екатерина Николаевна – «EDU Stream» компаниясының әдіскері, педагог-сарапшы (Қарағанды облысы); Қадырова Меруерт Даниялқызы – педагог-сарапшы (Жамбыл облысы); Назарбекова Ангела Кенесарқызы – педагог-сарапшы (Түркістан облысы).

Семинар соңында қатысушыларға электронды сертификаттар табысталды.

Бұл шара «Келешек мектептері» ұйымдарының мұғалімдеріне тәжірибе алмасу мен кәсіби дамудың жаңа мүмкіндіктерін ұсынды.