Әбіш мұрасын ұлықтаған тағылымды байқау қорытындыланды

Ақтау қаласында өткен «Әбіш оқулары» республикалық ғылыми-шығармашылық конкурсы өз мәресіне жетті. Үш күнге созылған рухани-танымдық іс-шараға еліміздің 21 өңірінен келген 8-11 сыныптың 177 оқушысы қатысып, көрнекті қаламгер, мемлекет және қоғам қайраткері Әбіш Кекілбаевтың бай әдеби мұрасын терең зерделеді.

Байқау барысында жас дарындар жазушы шығармашылығын әр қырынан танытып, көркемсөз оқу, ғылыми-зерттеу жобаларын қорғау, сахналық қойылымдар көрсету, иллюстрациялық сурет салу және ақындар мүшәйрасы бағыттары бойынша бақ сынады. Қатысушылардың шығармашылық ізденісі мен әдеби талғамы олардың ұлттық руханиятқа деген құрметін айқын аңғартты.

Конкурс аясында ұйымдастырылған мәдени-танымдық бағдарламалар да жас өрендерге ерекше әсер сыйлады. Қатысушылар Маңғыстау өңірінің тарихи-рухани орындарын аралап, Әбіш Кекілбайұлының туған жерімен танысты. Бұл сапарлар олардың рухани көкжиегін кеңейтіп, ұлттық әдеби мұраға деген қызығушылығын арттыра түсті.

Байқау қорытындысы бойынша жеңімпаздар мен жүлдегерлер І, ІІ, ІІІ дәрежелі дипломдармен, грамоталармен және ақшалай сыйлықтармен марапатталды. Атап айтқанда, І дәрежелі дипломды 17 жеңімпаз, ІІ дәрежелі дипломды 26 жүлдегер, ал ІІІ дәрежелі дипломды 39 қатысушы иеленді.

Сонымен қатар, командалық есеп бойынша да үздік өңірлер анықталды. «Үздік команда» номинациясы бойынша І орын Маңғыстау облысының құрамасына бұйырды. ІІ орынды Батыс Қазақстан және Жетісу облыстарының командалары өзара бөліссе, ІІІ орын Қостанай және Түркістан облыстарының командаларына табысталды.

Іс-шара Қазақстан Республикасы Оқу-ағарту министрлігінің «Дарын» республикалық ғылыми-практикалық орталығының қолдауымен Маңғыстау облысының білім басқармасы және «Каспий дарыны» өңірлік орталығының ұйымдастыруымен өтті.