Қазақстан құрамасы Лингвистикадан халықаралық олимпиадада тарихи нәтиже көрсетті

2026 жылғы 26 шілде мен 2 тамыз аралығында Румынияның Бухарест қаласында Лингвистикадан халықаралық олимпиада (IOL) өтті.

Қазақстан құрамасының төрт мүшесі де жоғары нәтиже көрсетіп, бір қола медаль мен үш Құрмет грамотасын иеленді.

Қола медаль иегері:

• Шыңғыс Карасаев – Орал қаласындағы жаратылыстану-математика бағытындағы NIS-тің 12-сынып оқушысы.

Құрмет грамотасының иегерлері:

• Рамазан Бутантаев – Маңғыстау облысы Ақтау қаласы бойынша білім бөліміне қарасты Мамандандырылған IT лицейінің 11-сынып оқушысы;

• Аслан Ажибаев – Павлодар қаласындағы жаратылыстану-математика бағытындағы NIS-тің 12-сынып оқушысы;

• Кирилл Тургумбаев – Қостанай облысы Жітіқара ауданы білім бөліміне қарасты Абай атындағы мектеп-лицейінің 11-сынып оқушысы.

Осылайша, Қазақстан құрамасының аталған олимпиадаға қатысу тарихында алғаш рет команда мүшелерінің барлығы марапатқа ие болды.

Құрамаға Ягеллон университетінің студенті Оспанова Дана Еркінқызы жетекшілік етті.

Олимпиадалық лингвистика елімізде дамып келе жатқан жаңа бағыттардың бірі. Бұл нәтиже қазақстандық оқушылардың аталған саладағы жоғары әлеуетін көрсетті.

Құрама мүшелерін және жетекшісін, сондай-ақ оқушылардың ұстаздары мен ата-аналарын шын жүректен құттықтаймыз! Жас зияткерлерімізге алдағы жарыстарда толағай табыс тілейміз!

Олимпиада туралы ақпарат

Халықаралық лингвистика олимпиадасы (IOL) — мектеп оқушыларына арналған он екі халықаралық ғылыми олимпиаданың бірі. 2003 жылы негізі қаланған бұл олимпиада қатысушыларды әлем тілдерінен алынған лингвистикалық жұмбақтарды шешуге шақырады. Бұл тапсырмаларды орындау үшін логикалық ойлау, шығармашылық және мәселелерді шешу дағдылары қажет. Басқа көптеген байқаулардан айырмашылығы, IOL олимпиадасына қатысу үшін нақты бір тілді немесе лингвистика негіздерін алдын ала білу міндетті емес. Қатысушылар таныс емес тілдік құрылымдарды — синтаксис, фонология, семантика және жазу жүйелерін — зерттеп, заңдылықтарды табуға тырысады.

Олимпиада екі бөлімнен тұрады:

Жеке тур, мұнда қатысушылар тапсырмаларды өз бетінше орындайды;
Топтық тур, мұнда ұлттық командалар күрделірек тапсырмаларды бірігіп шешеді.

Бұл олимпиада қатысушылардың зияткерлік дамуына ғана емес, сонымен қатар мәдени сананы арттыруға ықпал етеді. Себебі тапсырмаларда сирек кездесетін және жойылып бара жатқан тілдер жиі кездеседі, бұл — әртүрлі тілдік қауымдастықтардың байлығын танытады.

Уақыт өте келе IOL олимпиадасы жаһандық деңгейде тілдік әртүрлілікті және адамзат қарым-қатынасын тереңірек түсінуге бағытталған маңызды алаңға айналды. Әр жылы бұл олимпиада лингвистикалық талдау шеберлігін мәдени таныммен ұштастыра отырып, білімнің шегін кеңейтетін дарынды оқушыларды біріктіреді.