«Дарын» Республикалық ғылыми-практикалық орталығы ХХІ Республикалық Абай оқуларын 23-25 тамыз күндері онлайн форматында өткізеді

Қазақ халқының ұлы ақыны, ағартушысы Абай Құнанбайұлының 175 жылдық мерейтойына арналған іс-шаралар аясында ҚР Білім және ғылым министрлігінің «Дарын» республикалық ғылыми-практикалық орталығы ХХІ республикалық Абай оқуларын ағымдағы жылдың 23-25 тамыз күндері аралығында онлайн форматында өткізеді.

Абай оқуларының негізгі мақсаты – қазақ халқының әдеби мұрасын насихаттау, оқушылардың классикалық қазақ әдебиетін оқуға қызығушылығын арттыру, Абай мен Шәкәрім шығармашылығын насихаттау, оқушылардың эстетикалық талғамын, шығармашылық қабілеттерін дамыту, ұлы ақындардың поэзиясына, рухани мұрасына деген сүйіспеншілікке тәрбиелеу болып табылады.

Ережеге сәйкес, Абай оқулары үш кезеңде өткізіледі: аудандық (қалалық), облыстық және республикалық. Республика бойынша Абай оқуларының аудандық кезеңіне 13625 оқушы, облыстық кезеңге 1759 оқушы қатысты. Республикалық қорытынды кезеңге 120 оқушы қатысады деп күтілуде.

Абай оқуларының республикалық кезеңі 6 номинациядан  тұрады:

1 номинация – «Өлең – сөздің патшасы, сөз сарасы» номинациясы – Абай өлеңдерін жатқа оқу конкурсы.

2 номинация – «Абайдың қара сөздері» номинациясы бойынша Абайдың қара сөздерін жатқа, мәнерлеп оқу.

3 номинация – «Абайдың ақын шәкірттерінің шығармалары» номинациясы бойынша Шәкерім Құдайбердіұлы, Ақылбай Абайұлы, Мағауия Абайұлы шығармаларын жатқа оқу. 

4 номинация – «Көңілім әнді ұғады» номинациясы – оқушының Абай мен Шәкәрімнің әндері мен күйлерін орындау шеберлігі бағаланады.

5 номинация – «Жүйріктен жүйрік озар жарысқанда»  номинациясы –оқушылардың өз шығармалары (поэзиялық) бағаланады.

6 номинация – «Ұлылар әлемі» Абай мен Шәкәрімнің шығармашылығына, рухани болмысына қатысты тақырыпқа эссе жазу.

Айта кетерлігі, қатысушылар ақындардың барлық шығармаларын жатқа білуі керек.

Абай оқуларының жеңімпаздары мен жүлдегерлері Қазақстан Республикасы Білім және ғылым министрлігінің І, ІІ, ІІІ дәрежелі дипломдарымен, сондай-ақ «Дарын» республикалық ғылыми-практикалық орталығының грамоталары және бағалы сыйлықтарымен марапатталады.

Ескерте кетейік, биыл ХХІ республикалық Абай оқуларын ағымдағы жылдың 23-25 тамыз күндері аралығында онлайн форматында өтеді.

Байқауды көрем деушілердің барлығы оны Youtube каналында тамашалай алады. Канал  сілтемесі кейінірек http://daryn.kz сайтында және https://t.me/daryn_centre; https://www.facebook.com/RSPCDaryn/https://www.instagram.com/rspc_daryn/әлеуметтік желілерінде жарияланатын болады.