Кіру/Тіркелу
Америкалық ұйымдар STEM мұғалімдерді даярлау бойынша білім беру бастамасын іске қосты. 3D модельдеу және робототехникаға арналған тегін тренинг Arduino микроконтроллерлеріне негізделген. Жоба Қазақстандағы АҚШ Елшілігінің және “Дарын” республикалық ғылыми-практикалық орталығының қолдауымен Астана, Алматы, Павлодар, Өскемен, Қарағанды, Ақтөбе, Орал, Шымкент, Петропавл және Қостанай қалаларында өтуде.
Тренинг бағдарламасында қазақстандық мектептердің 200 мұғалімі 3D модельдеу және робототехника негіздерін меңгеріп, жобаларды құру және енгізу үшін Autodesk 123D Design бағдарламасын пайдалануды үйренетін бір апталық интенсивті курстан өтеді.
Тәлімгерлік тренингті информатика, роботехника және 3D моделдеу саласының сарапшылары мен оқытушылары және робототехника клубының жетекшілері жүргізеді. Сондай-ақ, волонтерлер бағдарлама барысында қатысушыларға тұрақты нұсқаулықтар беріп, қолдау көрсетеді.
Қарқынды апталық оқытудан кейін қатысушылардың бір ай бойы тәлімгердің жетекшілігімен тереңдетіп оқуға және тәжірибені ары қарай жалғастыруға, өз жобаларын жасауға мүмкіндігі болады.
Тренинг соңында, 15-16 наурыз күндері Америка ұйымдарында қорытынды турнир өткізіліп, қатысушылардың жетістіктері мен шығармашылық жұмыстары көрсетіледі. Студенттермен бірлесе отырып топ құрған мұғалімдер өз жобаларын ұсынады.